MOVIMENTO

In Engiadina Ota
MOVIMENTO Samedan

Lavur ed occupaziun

Las ufficinas, ils ateliers, la falegnamaria e la tessonda da l'UFFICINA Samedan spordschan multifarias plazzas da lavur e d'occupaziun assistidas a var 40 persunas a partir da 18 ons cun impedimaints fisics sco eir psichics ligers, medis o greivs. Ils abitants pon far da maniera auto-determinada e sainza squitsch da prestaziun lur lavur ütila chi tils fa plaschair e tils dà üna structura dal di. Il böt da l'occupaziun es l'integraziun sociala e professiunala.

Masüras d'integraziun professiunalas AI

Activitats da cumpensaziun da l‘eivna

Nossas activitats da cumpensaziun da l‘eivna (nodar, sunar, sotar) servan in prüma lingia a la regeneraziun sco eir per mantegner ed augmantar la sandà fisica. Ellas sun ün elemaint important in l'assistenza cumplessiva da persunas cun ün impedimaint. Qua cha las activitats da cumpensaziun han lö in ün'atmosfera allegra e sainza sforz, fuorman ils giavüschs e'ls bsögns dals partecipants üna basa importanta per la concepziun.

Abitar

Illa gestiun MOVIMENTO "UFFICINA" spordschain nus a Samedan tuot in tuot 25 plazzas d'abitar assistidas a persunas cun ün impedimaint corporal o spiertal chi han bainschi dabsögn d'ün sustegn, chi vöglian però viver tant sco pussibel independentamaing. Cun gronda sensibilità accordain nus il möd d'assistenza e d'intensità al bsögn individual dal singul abitant. Chi's tratta d'üna assistenza cumpletta, assistenza parziala, chüra o accumpognamaint: Nos persunal qualifichà praista illas gruppas d'abitar assistidas ün agüd chi correspuonda als bsögns e promouva uschè l'agir independent ed auto-determinà.

Illa cumünanza d'abitar "Palü" e Chesa Dosch vivan persunas creschüdas a partir da 18 ons chi mainan insembel üna vita sco i'l minchadi da famiglia: Ellas fan lur lavur dürant il di in üna da nossas plazzas da lavur e d'occupaziun, fan cumünaivelmaing la chasada, cuschinan insembel ed organiseschan lur temp liber. Pro tuot quai vegnan ellas adüna sustgnüdas ed accumpagnadas da las persunas d'assistenza respectivas. Mincha abitant ha tant üna sfera privata in sia stanza sco eir pussibiltats da s'inscuntrar i'ls locals d'inscunter cumünaivels.