Società MOVIMENTO

Insembel tras
il minchadi

Abitar assisti
MOVIMENTO

La Società MOVIMENTO spordscha a persunas cun ün impedimaint corporal o spiertal aint in chasas d'abitar assistidas a Samedan, Poschiavo e Scuol ün dachasa cun differentas spüertas d'assistenza. Chi's tratta d'üna assistenza cumpletta, assistenza parziala, chüra o accumpognamaint: Nus sustgnain als abitants individualmaing tenor lur bsögns ed abiltats per pudair promouver uschè üna vita auto-determinada.

Illa cumünanza d'abitar mainan ils abitants insembel üna vita sco i'l minchadi in famiglia: Els fan lur lavur dürant il di in üna da nossas plazzas da lavur e d'occupaziun, fan cumünaivelmaing la chasada, cuschinan insembel ed organiseschan lur temp liber. Pro tuot quai vegnan els adüna sustgnüts ed accumpagnats da las persunas d'assistenza respectivas.

Cun l'assistenza dal di, la guardgia da not, il piket da not, il servezzan da clom, l'assistenza dürant la fin d'eivna e'ls dis da festa eschan nus preschaints pels abitants dürant 24 uras al di e 365 dis l'on.

45 plazzas d'abitar in Grischun

Illas chasas d'abitar da l'UFFICINA Samedan, da INCONTRO Poschiavo e da la BUTTEGA Scuol spordschain nus tuot in tuot 45 plazzas d'abitar in differentas gruppas d'abitar. Per mincha abitant sta a disposiziun üna stanza d'ün let ch'el po drizzar aint tuottafat tenor seis gust.

Persunas cun üna mobilità o orientaziun limitada profitan particularmaing da las spüertas d'abitar illa BUTTEGA Scuol sco eir ill'UFFICINA Samedan. Perquai chi'd es pussibel in tuottas duos gestiuns MOVIMENTO d'abitar e da lavurar in üna chasa.

Plazzas d'abitar libras in gruppas d'abitar assistidas

Tschercha El/Ella per sai o per ün paraint ün dachasa in üna chasa d'abitar assistida da la Società MOVIMENTO, ill'UFFICINA Samedan, in INCONTRO Poschiavo o illa BUTTEGA Scuol? Gugent Til/Tilla cussaglia Markus Spillmann persunalmaing al telefon +41 (0)81 851 12 11 o markus.spillmann@movimento.ch, per chattar la plazza d'occupaziun optimala e'l sectur da lavur adattà.